Հանգստյան օրերի տուր (3 օր/2 գիշեր)

Եթե արձակուրդներին պետք է դեռ երկար սպասեք, սակայն ուզում եք լիցքաթափվել և անմոռանալի օրեր անցկացնել, ապա Հանգստյան օրերի տուրը Հայաստանում աշխատանքային առօրյայից կտրվելու լավագույն միջոցն է: 3-օրյա մատչելի էքսկուրսիայի ընթացքում կծանոթանաք Հայաստանի տեսարժան վայրերին: Հանգստյան օրերի մատչելի տուրը հնարավորություն է տալիս տեսնել մայրաքաղաք Երևանը, Արարատ բիբլիական լեռը, պատմա-մշակութային կենտրոններ, օբյեկտներ, որոնք գտնվում են ՅՈւՆԵՍԿՕ-ի հովանու ներքո, համտեսել Հայաստանի ազգային բրենդը՝ կոնյակը:

Հանգստյան օրերին Հայաստան գալով՝ բազում զգացմունքների և դրական էներգիայի պաշար կհավաքեք առաջիկա մի քանի ամիսների համար: Հանգստյան օրերին Հայաստանում ձեզ պարուրած ջերմությունն ու կենսուրախությունը կջերմացնեն ձեզ և տուն վերադառնալուց հետո դեռ շա՜տ երկար կհիշեք լավագույն հանգստյան օրերը:

Դիմավորում օդանավակայանում

Հայաստանի հետ ծանոթությունը կսկսենք Երևանի տեսարժան վայրերից: Երևանի ճարտարապետությունը յուրօրինակ է և ինքնատիպ: Այսօրվա Երևանը ճարտարապետական տարբեր ոճերի, կանաչ պուրակների, բազմաթիվ շատրվանների քաղաք է: Այցի ընթացքում կծանոթանաք Երևանի տեսարժան վայրերին. Ֆրանսիայի հրապարակ, Օպերայի և բալետի թատրոն, Հյուսիսային պողոտա, Հանրապետության հրապարակ:

Կմեկնենք Մեսրոպ Մաշտոցի անվան հին ձեռագրերի ինստիտուտ` Մատենադարան: Ամենահին ձեռագրերը պատկանում են 5-րդ դարին և կապված են հայ գիրը ստեղծած Մեսրոպ Մաշտոցի անվան հետ:

Հաջորդը կլինենք ճարտարապետա-կոթողային համալիր Կասկադում. 500-մետրանոց աստիճաններ (522 հատ), որոնք կառուցված են տուֆից: Կասկադի նախահեղինակը եղել է Ալ.Թամանյանը: Այն բացօթյա թանգարան է, որտեղ կարելի է հիանալ ժամանակակից արվեստի շուրջ 30 քանդակներով: Համալիրում է գտնվում Գաֆէսճեան արվեստի կենտրոնը:

Տեղավորում հյուրանոցում

Նախաճաշ հյուրանոցում

Հայաստանում ուղևորությունը կշարունակենք` այցելելով Գառնու հեթանոսական տաճար, որը I դարում կառուցել է Տրդատ Ա թագավորը և նվիրված է եղել Արևի աստված Միհրին: Քրիստոնեության ընդունումից հետո ամրոցը եղել է Տրդատ Գ թագավորի քրոջ՝ սուրբ Խոսրովիդուխտի «ամառանոցային սենյակը»։

Հաջորդ կանգառը Գեղարդի (XIII դար) ժայռափոր ինքնատիպ եկեղեցական վանքն է, որն ընդգրկված է ՅՈՒՆԵՍԿՕ-ի մշակութային ժառանգության ցանկում: Վանքի անվանումը կապված է այն նիզակի հետ, որի ծայրով հռոմեացի զինվորը խոցեց խաչված Հիսուսին: Ներկայումս այն պահվում է Էջմիածնի Մայր աթոռի թանգարանում:

Մեզ սպասում է ուղևորություն դեպի Հայաստանի կապուտակ գեղեցկուհի Սևան: Սևանալիճը Հայկական լեռնաշխարհի քաղցրահամ լիճն է, Կովկասի ամենամեծ լիճը: Այն համարվում է տարածաշրջանի խմելու ջրի երաշխավորված աղբյուր:

Այցելություն Սևանավանք` վանական համալիր լճի ափին, Սևան թերակղզում, որը նախկինում կղզի է եղել:

Վերադարձ Երևան

Նախաճաշ հյուրանոցում

Կայցելենք Երևանի կենտրոնական շուկա: Չրերն ու քաղցր սուջուխը ազգային հպարտությունն են և կոնյակի լավագույն ուղեկիցը: Հայաստանում չիր կարող են պատրաստել համարյա ամեն ինչից՝ ներառյալ ձմերուկից, սեխից և նույնիսկ պոմիդորից:

Վերնիսաժում` ձեռագործ իրերի ցուցահանդես-տոնավաճառում կարող եք հուշանվերներ գնել ձեր մտերիմների համար: Այստեղ կգտնեք փայտից սարքված շախմատ և նարդի, ազգային ոճով պատրաստված կերամիկական իրեր, hand made զարդեր, ազգային երաժշտական գործիքներ, արծաթե զարդեր, նկարներ և այլն:

Այցելություն Ծիծեռնակաբերդ`1915թ. Հայոց ցեղասպանության զոհերի հուշահամալիր և թանգարան:

Ցանկության դեպքում (լրացուցիչ վճարով) կայցելենք Երևանի Կոնյակի գործարան, որտեղ կհամտեսենք տարբեր տարիների կոնյակ (3 տարվա «Արարատ» և 10 տարվա «Ախթամար»):

Հաջորդը կմեկնենք Հայաստանի հոգևոր քաղաք: Կայցելենք Ամենայն հայոց կաթողիկոսի նստավայր Մայր Աթոռ Սուրբ Էջմիածին` Մայր տաճար (301թ.), որը գտնվում է ՅՈՒՆԵՍԿՕ-ի մշակութային ժառանգության ցանկում:

Կտեսնենք նաև ՅՈՒՆԵՍԿՕ-ի Համաշխարհային մշակութային արժեքների ցանկում ընդգրկված Զվարթնոց տաճարի ավերակներ: Տաճարն ավերվել է երկրաշարժի հետևանքով:

Տրանսֆեր օդանավակայան

Մեզ հետ կապվելը շատ հեշտ է: Կայքում կարող եք պատվիրել զանգ, գրել էլեկտրոնային նամակ կամ «Ցանկանում եմ գալ Հայաստան» տեքստով հաղորդագրություն ուղարկել: Մենք կկապվենք Ձեզ հետ ամենամոտ ժամանակում: