Բյուջետային տուր դեպի Հայաստան (7 օր / 6 գիշեր)

Հայաստանը յուրահատուկ և անկրկնելի երկիր է՝ զարմանալի բնությամբ, եզակի ճարտարապետական ​​հուշարձաններով և համաշխարհային պատմական մեծ ժառանգությամբ։ Եթե պլանավորում եք 1-շաբաթյա հանգիստ, ապա այս 7-օրյա բյուջետային տուրը Հայաստանում հենց Ձեզ համար է: Հայաստանում 1-շաբաթյա ճամփորդության ընթացքում շատ հույզեր և դրական էներգիայի պաշար կհավաքեք առաջիկա մի քանի ամիսների համար։

Հայաստանում բյուջետային տուրի ծրագիրը (7 օր / 6 գիշեր) թույլ կտա ձեզ տեսնել մայրաքաղաք Երևանը, բիբլիական Արարատ լեռը, պատմամշակութային կենտրոններ և ՅՈՒՆԵՍԿՕ-ի Համաշխարհային ժառանգության ցանկում ընդգրկված օբյեկտները։

Բացահայտե՜ք Հայաստանը ձեզ համար։ Այստեղ յուրաքանչյուր ոք կգտնի ինչ-որ առանձնահատուկ բան։

Դիմավորում օդանավակայանում։

Տուրը Հայաստանում կսկսենք Երևանի տեսարժան վայրերի էքսկուրսիայով: Երևանի ճարտարապետությունը յուրօրինակ է և ինքնատիպ: Այսօրվա Երևանը ճարտարապետական տարբեր ոճերի, կանաչ պուրակների, բազմաթիվ շատրվանների քաղաք է: Այցի ընթացքում կծանոթանաք Երևանի տեսարժան վայրերին. Ֆրանսիայի հրապարակ, Օպերայի և բալետի թատրոն, Հյուսիսային պողոտա, Հանրապետության հրապարակ:

Հետո կուղևորվենք Սուրբ Մեսրոպ Մաշտոցի անվան հին ձեռագրերի ինստիտուտ՝ Մատենադարան։ Այստեղ պահվող ամենահին ձեռագրերը 5-րդ դարի են և կապվում են հայկական գիրը ստեղծած Մեսրոպ Մաշտոցի անվան հետ։

Հաջորդիվ կգնանք դեպի Կասկադ։ Մեծ Կասկադը 500-մետրանոց աստիճանաշար է (572 աստիճան)՝ շատրվաններով և ծաղկաթմբերով, ինչպես նաև թանգարան՝ բաց երկնքի տակ, որտեղ ներկայացված են հայտնի վարպետների մոտ 30 քանդակներ: Համալիրի ներսի 5 հարկում Գաֆեսճյան արվեստի կենտրոնն է։

Տեղավորում հյուրանոցում։

Նախաճաշ հյուրանոցում։

Հաջորդիվ կայցելենք Ծիծեռնակաբերդի հուշահամալիր (նվիրված 1915 թվականի Հայոց ցեղասպանության զոհերի հիշատակին) և Ցեղասպանության թանգարան։

Հայաստանում մեր ճանապարհորդությունը կշարունակենք դեպի Գառնիի հեթանոսական տաճար, որը կառուցել է հայոց Տրդատ Ա թագավորը I դարում, և նվիրված է արևի աստծուն` Միհրին։ Ազատ գետի կիրճը հայտնի է իր բազալտե սյուներով, որոնք հրաբխային լավայի հոսքի արդյունք են։

Քայլելով կիջնենք կիրճ։ Կտեսնենք «Քարերի սիմֆոնիա» կամ «Բազալտե երգեհոն» բնական հուշարձանը։ Եթե ​​հեռվից նայեք կիրճին, ժայռերը կարծես հսկա երգեհոնի նման լինեն։ Բազալտե սյուների զարմանալի սիմետրիկությունն աչք է գրավում և հիացմունք առաջացնում։ Կիրճով է հոսում Ազատ գետը։

Հաջորդ կանգառը կլինի Գեղարդի վանական համալիրում. ընդգրկված է ՅՈՒՆԵՍԿՕ-ի Համաշխարհային մշակութային ժառանգության ցանկում: Ամբողջական անվանումն է Գեղարդավանք (Գեղարդ՝ տեգ բառից)։ Վանական համալիրի անվանումը գալիս է Սուրբ Գեղարդից, որով հռոմեացի զինվոր Լոնգինուսը խոցել է Հիսուս Քրիստոսին։ Գեղարդն այժմ պահվում է Էջմիածնի Մայր տաճարի գանձարանում։

Վերադարձ Երևան։

Ցանկության դեպքում (լրացուցիչ վճարով) կայցելենք Երևանի կոնյակի գործարան, որտեղ մեզ սպասվում է հետաքրքրաշարժ էքսկուրսիա՝ 2 տեսակի կոնյակի (3 տարվա «Արարատ» և 10 տարվա «Ախթամար») համտեսմամբ։

Նախաճաշ հյուրանոցում:

Հայաստանում էքսկուրսիոն այս օրը կսկսենք հայկական Խոր Վիրապ վանական համալիր այցելությամբ, որը գտնվում է Արարատ լեռան ստորոտին: Այն ուխտատեղի է և կապվում է Գրիգոր Լուսավորչի լեգենդի հետ։ Եկեղեցական ավանդության համաձայն՝ Գրիգորը Տրդատ Գ թագավորի հրամանով բանտարկվել է զնդանում, դատապարտվել քրիստոնեություն դավանելու համար և այնտեղ անցկացրել շուրջ 14 տարի։ Ցանկացողները կարող են իջնել զնդան, որն ունի 6 մ խորություն և 4,4 մ տրամագիծ։

Շատ մոտ հեռավորությունից և իր ողջ փառքով ձեր առջև կհայտնվի Հայաստանի խորհրդանիշը՝ Արարատ լեռը։

Հաջորդիվ կշարունակենք մեր ճանապարհորդությունը դեպի Հայաստանի Վայոց ձորի մարզի Արենի գյուղ։ Արենի գյուղը հիմա էլ հայտնի է իր գինիներով։ Ամեն տարի հոկտեմբերին այնտեղ տեղի է ունենում գինու փառատոն։

Ցանկության դեպքում (լրացուցիչ վճարով) կայցելենք «Արենի» գինու գործարան և գործարանի համտեսի սրահում կփորձենք հայկական գինի։ Այս արտադրողի գինիները տարբերվում են անկրկնելի համով։ Բույրերի փունջն աստիճանաբար է բացահայտվում՝ թողնելով հաճելի հետհամ:

Հաջորդիվ կուղևորվենք Արենի գյուղից 7 կիլոմետր դեպի արևելք գտնվող Նորավանք վանական համալիր՝ կառուցված XIII–XIV դարերում։ Համալիրը գտնվում է Արփա գետի վտակի նեղ ոլորուն կիրճի եզրին։ Կիրճը հայտնի է վանքի հետևում բարձրացող ուղղաձիգ կարմիր ժայռերով։

Վերադարձ Երևան։

Նախաճաշ հյուրանոցում։

Օրը կսկսենք դեպի Հայաստանի մարգարիտ՝ կապուտակ Սևան ուղևորությամբ։ Սևանա լիճը քաղցրահամ լիճ է Հայկական լեռնաշխարհում, Հարավային Կովկասի ամենամեծ լիճն է։ Այն տարածաշրջանում քաղցրահամ ջրի ապահովման խոշոր աղբյուր է։

Այցելություն Սևանավանք՝ վանական համալիր Սևանա լճի հյուսիսարևմտյան ափին: Վանքը գտնվում է Սևանի թերակղզում, որը նախկինում փոքրիկ կղզի էր։

Կշարունակենք մեր ճանապարհորդությունը դեպի Հայաստանի Տավուշի մարզ՝ գեղատեսիլ Աղստև գետի ափին գտնվող փոքրիկ առողջարանային քաղաք Դիլիջան։

Հաջորդ կանգառը կլինի Հաղարծնի վանքում, որը կառուցվել է X–XIII դարերում՝ մեծամասամբ Բագրատունիների տոհմի հովանավորությամբ։

Կայցելենք նաև Գոշավանք՝ XII–XIII դարերի վանական համալիր Հայաստանի Գոշ գյուղում։ Գոշավանքը եղել է միջնադարյան Հայաստանի մշակութային, կրթական և կրոնական կենտրոն։ Աղբյուրներում հիշատակվում է որպես ճեմարան, համալսարան և այլն։

Վերադարձ Երևան։

Նախաճաշ հյուրանոցում։

Հայաստանում էքսկուրսիոն այս օրը կսկսենք Սաղմոսավանք (XII–XIII դդ.) այցելությամբ: Գտնվում է Քասախ գետի գեղատեսիլ կիրճի աջ ափին՝ Արայի լեռան (2577 մ) դիմաց։ Վանքը հնարավորություն է տալիս զգալու հայկական ճարտարապետության ողջ ուժն ու հնությունը։

Կանգառ Տառերի պուրակի մոտ։ Սա հայկական այբուբենի հուշարձան է, որը բաղկացած է հայոց այբուբենի 39 տառերից։ Այդտեղ են գտնվում նաև Մեսրոպ Մաշտոցի և նրա աշակերտների հուշարձանները։

Հաջորդիվ կշարունակենք մեր ճանապարհորդությունը դեպի Ամբերդ ամրոց («Ամպերի ամրոց», VII–XIII դարեր), որը գտնվում է Արագած լեռան հարավային լանջին՝ ծովի մակարդակից 2300 մ բարձրության վրա։

Վերջին կանգառը Աղձքն է՝ գյուղ Հայաստանի Արագածոտնի մարզի հարավում։ Գյուղում է գտնվում Արշակունիների (Արշակունյաց) տոհմական դամբարանը։ Աղձքի պատմաճարտարապետական ​​համալիրը ներառում է 5-րդ դարի բազիլիկ եկեղեցի, որը վերականգնվել է 19-րդ դարում, և 4-րդ դարի կեսերի ստորգետնյա դամբարան, որտեղ ամփոփված են թագավորների մասունքները։

Վերադարձ Երևան։

Նախաճաշ հյուրանոցում։

Նախաճաշից հետո կուղևորվենք Սբ Էջմիածին՝ Հայ առաքելական եկեղեցու կենտրոն, որտեղ գտնվում է կաթողիկոսի նստավայրը։ Կայցելենք Էջմիածնի Մայր տաճար (301–303, հիմնովին նորոգվել՝ 483-484), որն ընդգրկված է ՅՈՒՆԵՍԿՕ-ի Համաշխարհային ժառանգության ցանկում։

Կայցելենք երկրաշարժի հետևանքով ավերված Զվարթնոց տաճարի ավերակները։ 2000 թվականին տաճարի ավերակները և նրա շրջակայքի հնագիտական տարածքը ներառվել են ՅՈՒՆԵՍԿՕ-ի Համաշխարհային ժառանգության ցանկում։

Վերադարձ Երևան։

Ապա կայցելենք Հայաստանի պատմության թանգարան։ Թանգարանի հավաքածուն ներառում է մոտ 400,000 ցուցանմուշ։ Թանգարանի ցուցադրությունը բաժանված է մի քանի բաժինների՝ հնագիտական, ազգագրական, դրամագիտական, պատմական ճարտարապետություն, Հայաստանի նոր և նորագույն պատմություն։

Նախաճաշ հյուրանոցում: Սենյակների հանձնում:

Կայցելենք Երևանի կենտրոնական շուկա։ Չրերը ազգային հարստություն են և կոնյակի սովորական ուղեկիցը: Հայաստանում կարծես թե ամեն ինչից կարելի է չիր պատրաստել, այդ թվում՝ ձմերուկից, սեխից և նույնիսկ լոլիկից:

Ապա՝ Վերնիսաժ` ժողովրդական արվեստի ապրանքների շուկա։ Այստեղ դուք կգտնեք փայտից պատրաստված շախմատ և նարդի, ազգային ոճով պատրաստված կերամիկական իրեր, ձեռագործ զարդեր, ավանդական երաժշտական գործիքներ, արծաթե զարդեր, նկարներ և շատ ավելին:

Տեղափոխում օդանավակայան:

Մեզ հետ կապվելը շատ հեշտ է: Կայքում կարող եք պատվիրել զանգ, գրել էլեկտրոնային նամակ կամ «Ցանկանում եմ գալ Հայաստան» տեքստով հաղորդագրություն ուղարկել: Մենք կկապվենք Ձեզ հետ ամենամոտ ժամանակում: