Հայկական զիփլայնը կներառվի աշխարհի ամենաերկարների թոփ տասնյակում

Տավուշի մարզի Ենոքավան գյուղը նոր զիփլայնի միջոցով կկապվի «Yell Extreme Park» էքստրիմ պարկի հետ։ Զիփլայնի երկարությունը կկազմի 2400 մետր։ Այդ մասին լրագրողների հետ զրույցում հայտնեց «Yell Extreme Park» պարկի հեղինակ և համահիմնադիր Տիգրան Չիբուխչյանը։

Ըստ նրա, աշխարհի ամենաերկար Zip Line կառուցման նախագծի հետ կապված ծագել են տեխնիկական ու ինժեներական խնդիրներ։

 

Ավելի վաղ նշվում էր, որ այդ Zip Line–ի երկարությունը կկազմի 2680 մ, բարձրությունը` 200–300 մետր, թռիչքի տևողությունը` 3 րոպե, իսկ առավելագույն արագությունը` 120 կմ/ժ։ Այդ ժամանակ աշխարհի ամենաերկար Zip Line–ը գործում Մեքսիկայում` 2545 մետր երկարությամբ։\

«Ոչ լիարժեք տեղագրական տվյալների պատճառով խնդիրներ են առաջացել հաշվարկների հետ։ Indiegogo քրաուֆանդինգային հարթակի միջոցով հավաքված բոլոր միջոցները ծախսվել են ինժեներական, ճարտարապետական աշխատանքների ու տեղագրության վրա։ Սակայն հետո մի շարք խնդիրներ առաջացան, և մենք սկսեցինք լուծումներ փնտրել։ Մինչ մենք զբաղված էինք այդ հարցերով Դուբայում կառուցեցին ամենաերկար զիփլայնը (2720 մետր), այնուհետև Հարավային Կորեայում։ Արդեն արդիական չէր բացել աշխարհի ամենաերկար զիփլայնը», – ասաց նա։

Միաժամանակ նա նշեց, որ ներկայում աշխատանքներ են ընթանում այլ վայրում նոր զիփլայն կառուցելու ուղղությամբ, որի երկարությունը կկազմի 2400 մետր։ Արդյունքում, ըստ նրա, հայկական նախագիծը կներառվի աշխարհի ամենաերկար զիփլայն ունեցող 10 երկրների ցանկում։

«Այստեղ արդեն պարզ է մեր լոգիստիկան։ Մենք բացում ենք այդ կետը գյուղի միջով, որպեսզի կապենք այն պարկի հետ։ Ամեն դեպքում, մենք կունենանք երկար զիփլայն, սակայն այն աշխարհի ամենաերկարը չի լինի», – ասաց նա։

Չիբուխչյանը հավելեց, որ քրաուֆանդինգի միջոցով տոմս ձեռք բերած անձինք կկարողանան օգտվել պարկի բոլոր ծառայություններից` կախված նվիրատվություններից ու առանց ժամանակային սահմանափակումների։

«Այս տարի մենք ավելի շատ ենք աշխատում պարկի ենթակառուցվածքի ու ծառայությունների բարելավման վրա։ Ունենք 2 մլն դոլար արժողությամբ պատրաստի ներդրումային ծրագիր, բանակցություններ են ընթանում մի շարք ընկերությունների ու հիմնադրամների հետ։ Հեղափոխության օրերին մեր աշխատանքները ժամանակավորապես դադարեցվել էին», – նշեց Չիբուխչյանն` ավելացնելով, որ ծրագրի շրջանակում նախատեսվում է առաջարկել մոտ 20 ծառայություն, մասնավորապես կկառուցվեն ավելի հարմարավետ ադմինիստրացիա, ֆուդկորտ, ատրակցիոններ։

 

Новости-Армения

Top