ԼՂՀ զբոսաշրջիկների հոսքն աճում է. Արցախցի մելիքի ամրոցը ճանաչված վայրերից է
Մելիք Եգանի ամրոցը դառնում է Արցախի հանրահայտ տեսարժան վայրերից մեկը: Այս մասին NEWS.am-ի թղթակցի հետ զրույցում հայտնեց ԼՂՀ կառավարությանն առընթեր Զբոսաշրջության և պատմական միջավայրի պահպանության վարչության ղեկավար Սերգեյ Շահվերդյանը:
Հադրութի շրջանի Տող գյուղում տեղակայված XVIII դարի ամրոցում (այն ժամանակների արցախյան մելիքությունների՝ փաստացի անկախ կենտրոններից մեկը) պահպանվել և վերականգնվել են ընդունելությունների սրահն ու բնակելի շինությունները:
«Այնտեղ արդեն թանգարան-արգելոց է ստեղծվել, որն անցյալ տարվանից բաց է այցելությունների համար: Բարեկարգվել է ամրոցի շրջակա տարածքը: Իսկ հիմա փորձում ենք գյուղում խթանել զբոսաշրջիկների համար հյուրատների ստեղծումը»,- նշեց Շահվերդյանը:
Նա նաև հավելեց, որ արտերկրից ժամանած բազմաթիվ հայեր, որոնք Երևանում էին Հայոց ցեղասպանության 100-րդ տարելիցի առիթով, այցելել են նաև Արցախ:
