Արգենտինայի դեսպան. «Հայաստանում դեսպան լինելը մեծ պատիվ է»

Տուրեր դեպի ՀայաստանՀայ–արգենտինական համագործակցության արդյունքում երևանյան հանդիսատեսը կարողացավ վայելել իսկական արգենտինական տանգոյի ողջ հմայքը։ Երևանում կայացած համերգին ներկա էր նաև Հայաստանում Արգենտինայի դեսպանը

Տանգոյի երեկոն անցավ արգենտինացի դիրիժոր և բանդոնեոնահար Կառլոս Բուոնոյի նվագակցությամբ։ Հայաստանում Արգենտինայի արտակարգ և լիազոր դեսպան Գոնսալո Ուռիոլաբեիտիան նշեց, որ նման մշակութային միջոցառումները կարևոր են երկկողմ համագործակցության համար։

«Իմ կարծիքով` մշակույթը կարող է մերձեցնել երկու ժողովուրդներին, հատկապես` հայ և արգենտինացի եղբայրական ժողովուրդներին»,- Sputnik Արմենիայի թղթակցի հետ զրույցում ասաց Ուռիոլաբեիտիան։

Նա նշեց, որ Արգենտինան բազմազգ երկիր է, և այդ միջավայրում հայերն իրենց տեղն ունեն։ Արգենտինացիներն իրենց հերթին շատ լավ գիտեն հայերին, նրանց ողբերգական պատմությունը։

«Ես ինձ ծանոթ ու հարազատ երկիր եմ եկել։ Հայաստանում դեսպան լինելը մեծ պատիվ ու պատասխանատվություն է ինձ համար` հատկապես հաշվի առնելով այն փաստը, որ դա իմ աշխատանքային առաջին փորձն է որպես դեսպան»,- ասաց նա` ավելացնելով, որ Հայաստանում դեսպան լինելն ավելի հեշտ է, քան աշխարհի ցանկացած այլ երկրում։

Ուռիոլաբեիտիան կարծում է, որ դեսպանները պետք է իրենց երկրի մշակույթը ներկայացնեն ու մատուցեն այն երկրում, որտեղ դիվանագիտական առաքելություն են իրականացնում։

Այսօրվա դրությամբ Հայաստանի և Արգենտինայի արտաքին քաղաքական գերատեսչություններն աշխատանքներ են տանում տարբեր ոլորտներում համագործակցությունը խորացնելու ուղղությամբ։ Դեսպանատների աշխատանքը նպաստում է այդ գործընթացին։

«Ինչպես տեսնում եք, կարճ ժամանակահատվածում Արգենտինայից երեք երաժշտական խումբ է ժամանել Հայաստան։ Դեսպանատանն առընթեր բացվել է մշակութային կենտրոն, որը կնպաստի մեր երկրների երկկողմ հարաբերությունների զարգացմանը»,- ասաց դիվանագետը։

Ուռիոլաբեիտիան խոստովանեց, որ հայերի ու հայկական մշակույթի ճանաչման հարցում էլ մեծ դեր է ունեցել Արգենտինայում բնակվող սփյուռքահայությունը։

«Ինձ գերեց հայ ժողովրդի սերը, ջերմությունը, փոխհարաբերությունները։ Հայ ժողովուրդը զարմանալի է իր հյուրընկալությամբ. նրանք հրավիրում են իրենց տուն, հյուրասիրում, բաժակ բարձրացնում և կենաց ասում, խմում ընկերության և ջերմության համար»,- նշեց դեսպանը։

Պարզվեց` արգենտինացի դիվանագետը նախընտրում է պանրով, կանաչիով և լավաշով բրդուճ ուտել։

Ուռիոլաբեիտիան Հայաստանում իր դիվանագիտական առաքելությունն է իրականացնում 2015 թվականի ապրիլից։

 

Sputnik Հայաստան

 

Top